Tapidaw Thu Zel Nuam In Duisung Teng Ah Vaak
Ka Saangmang te ii Khamtung ka lo uh bangza in zai a, a sung ah mihingte om zia, le bang lungman vai khawng teng om ci sia ka heak phot tu kisam phit saa ka hi ciang, Haka khua ka thet zawk uh hai ngawl in khuadaak tu in vaak kakoai sia, Rev. Carson nasepna bang ciang then a, bangteng kisam lai, ci khawng, sak sang ah bang za naa kiseam zo ci khawng ka mu nuam hi.

Haka ah ka phualpi uh pan Tonzang dong sia, ni 14 lam hi Hiak khua ah saang khat phuan tu, sya khat koi tu, ci in ka ngealnasa uh zong om si, hilai khua sia sak sang Zomite ngam ii a laisaan bel zong hi si, a khua zong inn tam bel teenna khua hi si, taciang saksang Zomite sung pan ukpi haat bel Hau Cin Khup teenna khua zong hi si tana, ka thet to ngawl in phamaw hi, ci in ka ngaisun hi Hau Cin Khup in a khua sung ah pilna sin natu saang khat ka dei ci si ahikom, sya inn tu le saanginn tu na saa vun ci in ki sawl ngei hi. Tuate man zo uh ahiciang, Kamhau mihing te teenna ngam ah Pathian thu hilh taw thua in pilna a pia tu in Sya Po Ku sia, 1905 kum June tha in ki puakto hi. Sya Po Ku sia a zi a tate taw patio hi.

A saang patang aneiphit sia Son Vung hi a, kum 17 pha a, Tonzang pan tai 2 khawng saksang paitona Tuitum khuami khat ahi hi. Thuhil le laihil thua in pilna ki pia ahi bangma 1905 kum September tha ciang, lungtang thak nei zo ing, doai biakna nusia zo ingh tua ahiciang Tapidaw nuntakna sung ah hong sang tavun ci in hong ngen hi. Hen Za Kam zong kum 16 pha a, Tuitum khuami ma hi. 1905 kum August tha in saang ka ki pan hi. Son Vung Tapidaw sua zawk tawmvei zawk ciang ama zong tel thiang ahiman in khangno hi te ngeal sia kum 1906 Febaruary tha ni 27 ni in Ukpi minthang mama Hau Cin Khup le a khuamite tam tatak ih muna ah tui ka phuum hi. Saya Po Ku in, hi bang in aki vawt sia Chrsit ii thupiakna thuzuina in ki vawt hi, ci in a hil hi.

Khuasak Khua Ah Thaa Mangthang Man
Sizang Ngam Khuasak khua ah Topa Jesu Kham Lukhu tung ah suan tu in aki dei suangmanpha te a zong tu in, Tonzang khua ah saang ka hon sak zawk uh ciang in, Sya Shwe Zan tavuan pia in ka pai sak uh hi. Kum 1904 kipat sawng in hi khua ah ka pai uh lai in Ukpi zaa a nei ulian 2 le puansil nei ngawl nguaktang in a vaak uh patang pawl khat te taw ka na ki mu uh hi. Ko hong muak uh hi. Tua lai in pilna sinna saang le lai a hil thei sya khat hong ngen hi. Hong nget uh sia ka thukim pui uh hi. Ahizong, saanginn le syapa inn tu te saksa in na koi vun ka ci uh hi.

Kum 1904 March 31
Hisia ni in sya Shwe Zan, a tapa Samuel a nungzang ah puakawm in le, a zi zong an neaktu nguai an te puanvaan tuun in a nungzang ah pua in a innkuan in Khuasak khua zuan tu in a pai uh sia ka mittang taw ka mu thei lai tawp khaak dong en in thupha ka pia hi. Khuasak khua sia Saangmang te lo thak vaatna khua khat ahi hi. Tuak mun ah saangmang naa seam tu in Sya Shwe Zan ka pai sak ahi hi. A nei uh teng theampo kuli 2 in pua aa, a pai uh hi. Ka thin sung ah khuangai huai sa in ka kakap hi. Banghangziam cile amate nupa sia Pathian khut sung ah a naa seam tu ka aap zawk sia, khatvei ni cituma hi pheang kasap, tu in simleitung buppi ah, Pathian a he ngawl belna mun khat ah ka puak ciang khuangai huai mama kasa hi. Hisia ni sia Khamtung mite atu in ni thak khat a kipat ni in tepte tu ahi hi. Carson te nupa in saksang Zomite sung nasep natu in Khuasak khua bulphu in sep tu a ngeal zawk uh ngei zo hinapi amate nupa (forlough khuan) kum ngei khuan la in America ah om uh ahiciang, kei liangko tung ah a sepna te a dawn tu ih tavuan hong ki suanh suak hi.

Khuasak khua ka vil phit uh lai in, thukimna khat ka nei uhsia, khua mite in saanginn le sya inn tu teng hong si tu a, ko in syate vaihawm sak tu ci hinapi, Shwe Zan ii a thet lai in tua inn sak vai taw kisai in bangma thelno khat zong vawt kholsa in a na koi bua hi. Tua ahiciang, Shwe Zan sia keima Khuasak khua ka thet phit lai ka ngiana buukno sia khat sung ah tum in pua tatawm tu in ki pan ci ka zaak ciang, sam kik heu tong ci in ka ngaisun hi. Ahizong, ama in hong om sak po tan ci in hong ngen a, nung kiin kik tu son ngawl in tua buuk sia sung a ngua khawng te a muat thei ngawl tu le inn sung tui cing in a om ngawl natu in a buuk kiimkot hawk lam to in tui a huup siat hi. Tua buuk mun sia asak sang teng cik naak hitana tuuklai son ngawl in khaal lai zong tui nawngna mun khat ahi hi. A dei cia in inn mun khat a suasak zawk ciang khua mite be paa a inn khat saa hi. A suat sia tui ii bat zawk ngawl tu in a nuam in om thei natu in lei pan kato thei tu in buukno saang khat a saa hi.

Kum 1904 May tha sung in hi nasep sia zawna lukhu khup natu in hong kikheal phit sia Ukpi te khat, a min Thuam Hang hi a, ka thet masak uh lai zong hong vaimuak pa hi. Azi min Dim Kho Ting hi a, doai biakna a nusiat natu in nasia tak in a, ki saan zawk ciang doai biak a nusia thei uh hi. Thuam Hang sia kum 36 pha a, a zi sia kum 30 pha hi. Amate ki saan na teng dam in kong son lai tu hi.

Kum 1904 May tha in hi nasep sia amaleap mama hi. Ukpi a 2 ha ahi Pau Suan le a zi Kham Ciang zong Vantung a om Pathian bia tu in a thin uh a na khensat uh hi. Pau Suan sia Kum 27 pha hi. Amate vai zong Shwe Zan in July tha hong laithakna sia sung ah hong son hi. Hong laithak sia hi bang in hong at hi.

Ka it Topa awng,
Nong hesuakna in tiamte in. Mihing khat ii a min Thuam Hang a ci sia, ukpi 3 sung pan ukpi lian bel ahi hi. Tu in Jesu um tu hong ki thoai hi. Tunitak in kei mun ah hong pai a, thu hong nget sak tan hong ci hi. Ka it Topa, na thunget ciang Thuam Hang zong phawk in hong nget sak tan Aw, ka Topa, tulaitak hisung ah hong theng thei lete Topa Jesu tung ah bangzata in na lungdam tu ziam?

Ko zong lai hisia in ka thintang uh hong kha mama hi. Tunung kum tampi khua ngei mama lai a, Louisville, KY. Khua “Southern Baptist Theological Seminary” a kici saang ah, Lai Thiangtho sin saangpatang khat in ka om lai thu khat ka phawk vazangh hi. Ka ulian belpa Sweden ah a om lai sia Tapidaw suak nuam ngawl top in om ahiciang ka he peuma a, Topa Pathian in kei atu in bangza ta in hong vawt sak ci teng a son tu in America pan Sweden ah ka cia vazangh hi. Ka U taw, ki si zo a, ka son nop teng ka son siat zawk ciang ka saang zuan tu in ka heak kik hi. America ngam Chicago theng kik zo a, meileang taw ka vana khat ah ka U hong laithak sia ka nga hi. ka U sia Topa Jesu ngupkhaitna sang zo a, ama siklesin (expenences) khawng teng zong hi dildel in hong at hi. Ka sim kakawm in lungdam leilam kisa keima nguakma kithuapui dang om ngawl bul ma ‘in, “Pathian minthang tawntung tahen” ci in nging vaduak in ka au hi Ka kiim ka paam ah a to te in mihing mamaw khat taw ki to khawm ci bang in hong ngaisun uh hi. Tualai aa ka lungdam za ma in Shwe Zan lai in hong lungdam sak mama hi. Ka zi taw nging tatak ma in nui khawm vahaw, tua zawk ciang lungdam leilam in thitui nawl, tua zawk ciang ka aw nei za taw Pathian pok in, “Vantung Kumpipa sia Khamtung Zomite sung hong tum zo aa, Zomite mun ah haw zo hi. Tuucing Topa in a tuu khat a bo sia zong a mu zo hi,” ci in au in Topa tung ah lungdam ka ko uh hi. Ko lamdang tatak ma nasa khu ve! (—–>page 9)