Tuhun ciang thiikhang natna sia hong laang kei thong a, khanghaam khangmoi doi ngawl a nei tam vaial hi. Nidang hun ka no lai khanghaam zawhiat te bekin nei thei kalai kahen hive, tu ciang khangmoi nano thiikhang natna nei hong tam vaial hi. Ih zaak ngei tawntung thu khat sia a al tam ne lei leang thikhang nga thei ci thu hi. Ahihang lai kiat tatuam sim leang thikhang nga natu sia a al neak hang bek zong na hi ngawl nginge hi.
Mihing te ii normal thii pressure sia atung 120 mm Hg kiim, anuai 60 mm HG kiim teng hi. Mihing khat le khat ih normal thii pressure kibang siat ngawl hi. Ih thii pressure normal saang in a tam zawk ciang ih pumpi in thuaklaa a, tasia thiikhang natna ki ci hi. Hi natna sia “ A pau tumteang ngawl mithat natna” (The silence killer) ki ci hi. Banghang ziam cile, natna hong nasiat mama ciang ih nei hunlam kiphawk pheang thei ahihang hi. Hong kipat hun sia bangma thuaklaakna om tuan lei ngawl a, a nei hunlam a kitel ngawl tam pheivei hi.
Thiikhang natna nei napi ih kibawl buale anuai ate kinga tato thei hi.
- Mit khuamuna zawm vaial thei
- Lung tuk tawlnga ling thei
- Pum zaw, pum lang zaw cite nga thei
- Nauta lal thei
- Lung natna ngei thei
A tamzaw ii ih heak thu sia a al tam ne lei leang thiikhang natna kinga ci thu hi. Khial ngawl hi, a al tam ne lei leang thiikhang natna kinga thei hi. Ahihang, atatak sia a al neak hang vateal hingawl, anuai ate hang in zong thiikhang natna kinga thei hi.
- Caffeine tam lei hang (caffeine dat sia coffee le niangte sungah kihel hi.)
- Zatui zahaa pawl khat hang (zatui sia damna ahihang ih kidawm buale natna zong piang sak thei)
- Nauta natna nei na pan thiikhang natna ah kizom thei
- Cocaine (No 4 ci in ih heak kham thei za)
- Numei te naungil pan thiikhang piang thei
- Zatawpna pan
- Thinkiamna (depression) pan
- Longtawl sung (Thyroid) sung dam ngawlna tatuam pan
- Thau leina pan
- Zum thum neina pan
- Thii sungah potassium, calcium le magnesium dat tawm lei hang
- Dianna tatuam (exercise) tawm lei hang
- Numei te naungil khaamna zatui neakna pan
A al ih ne vateal buazong atung ate taw zong thiikhang natna kinei thei hi. Hitana, ci al neak kidop zawk ciang atung ateng zong kidawm thei leang a phabel hi.
Thawngno
Source: Hello Sayawon
