2017 kum sung Pew research center te ii research vawtna ah, Asia ngam 20 vaal pan hong pai Asia minamte US ah million 20 bang om a, US Asian population ii zakhen 94% pha hi. Tua Asia minam 19 teng in mimal tambel pan kipan ngual suk leang Chinese, Indian, Fillipino, Vietnamese, Korean, Japanese, Pakistani, Cambodian, Hmong, Thai, Laotian, Bangladeshi, Burmese, Nepalese, Indonesian, Sri Lankan, Malaysian, Bhutanese le Mongolian minamte hi.
Hiteng sung pan a tambel apha Sente mimal 4,948,000 om a, a tawmbel Mongolian te mimal 21,000 pha hi. Ei Kawlngammi 168,000 om hi ci in hong kiciamte hi. USA ah Akaang, Avom, Hispanic le Asian ci in minampi 4 in kikhen a, hiteng sungpan Asian mimalsimna (population) khangbel hi. Tubang pai in khangsuak tu hi le, 2055 kum thet ciang Asian mimalsimna US bup mimalsimna ii zakhen 38% phat u a, Hispanic mimalsimna sang hong tam zaw tu hi.
Kawlngammi mimalsimna (population) sia 2000 kum in 17,000 bekma om hikale, 2010 kum ciang 100,000 thengto a, 2015 kum ciang 168,000 pha ahikom, nasia mama in khang hi. English kam pau thei phaza hong et laleo ciang Kawlngammite ih Asian pui minamdangte saang in kinangh zaw hi. US Asian theampo ii zakhen 70% na English kam nuam tatak in zangh thei hikale, Kawlngammi zakhen 28% bekma in English kam nuam sa ci hi. Ahihang US thet zawk bangtan vei ngeizo ni ziam ci kidokna ah kum 10 vaal US ah a teangsa kawlngammi zakhen 19% bekma om a, zakhen 81% in US ka thet zawk kum 10 cing bualai ci hi. Tua ahikom Kawlngammite ih English kam thiam ngawl sia lamdang lei ngawl hi.
Education
Education sang a theng khaakbel ih hihang maa ahi katawm, Asian dang te saang in kinangh zaw hi. US ngambup a et ciang post grade degree nga zakhen 11% om a, Bachelor degree nga zakhen 19%, College a ka ngei zakhen 29% le High School ahibuale a niam zaw zakhen 41% om hi. Asian theampo a et uh ciang America bup saang hoi zaw a, post grade degree nga zakhen 21% om a, Bachelor degree nga zakhen 30%, College a ka ngei zakhen 20% le High School ahibuale a niam zaw zakhen 29% om hi. Ahihang ei Kawlngam mite nguak a et laleo ciang post grade degree nga zakhen 7% om a, Bachelor degree nga zakhen 17%, College a ka ngei zakhen 10% le High School ahibuale a niam zaw zakhen 65% om a, college a theng ngawl zakhen tam mama hi.
Zawnna (Poverty)
US kumpi te in kum khat income a tum za tung tawn in mihausa (rich), a laihawl (middle class) le a zawng (poverty) ci in khen a, US ngambup sang ahizong Asian American-bup sang ahizong kiniam zaw hi.
Kawlngammi tam bel omna khua 10
USA ngam sungah Kawlngammi a tambel tenna state sia Minnesota state Minneapolis khua paam ah aom St. Paul khua hi a, Kawlngammi mimalsim (population) 10,000 vaal om hi. A nina le a thumna sia Texas state Dallas – Fort Worth le New York khua hi a, 7,000 kiim vave om hi.
