March 21; Zeini (March 20) Kawlngam Mit Htilar khuasung kham sai khatah kham zuak le, sai nei te kihauna pan buaina nasia mama piang aa, VOA son bang ahile mihing atawm bel 10 bang thi zo ci hi. Eleven media group ii son bang ahile, kham sai nei sia muslim te hi aa, numei khat le adang 3 kham zuak nuam in pai hi. A kham zuak nop sia sit tu in, kham sitna tungah a kiat le tal hi. Sai nei te in Kyats 80000 kong pia tu ci ahihang, uk ngawl in leaona ngen hi. Sai nei te in leao nuam ngawl ahikom kam kitam in a customer 4 teng vel hi. Vel athuak customer 2 pusuak in “hu tavun, hu tavun” ci in au ngawp aa, mihon hong kikhawm ngawp hi. Sun hun ciang vel athuak customer te 2 sung pan numei sia thi hi ci in thu thang ahikkom, mihon pi in tua kham sai kuan kik in susia cip hi. A kham sai min sia Weinh Sein hi. Mit Htila khua sungah Muslim zakhen 30% om hi ci in Mit Htila A-mat U Win Htein na ci hi. VOA son bang ahile, Muslim te na Kawl phungyi khat man in Muslim Bali khat ii huang sungah mei taw haal lum in thi ci hi. Buaina nasia vaial aa, Muslim le Buddhist buaina dan khat hong suak to hi. Buaina nasia ahikom nitak thunei kumpi te in inn pua pusuak thei ngawl tu ci in paok-mah 144 suak sak hi. Tu sia kaipui (police) te in nasia tatak control tu in hanciam hi. [VOA] [Eleven Media]