a peangpak pan bitphua leleau le a pasal in a peang nuai ah tuan cil nuam tu ahikom pumpi laisaan a om telngu pan bitphua hi. Banghangziam ci le lungtang taw kinai bel mun ahikom pasalte in zite sia it mama tu cinopna hi,” ci hi. Ih pumpi tungah a thupibel teng omna, motor bangh hile ih engine teng omna ih thin ih lung ih sungkua teng a dal a pao tu in telngu om hi nginge hi. Tua ahikom Zaangsi Lianu te sia ih pasal te atu in kiim le paam pan a lalsak thei, a susia thei, ngal le sate dalsak tu in hong bitphua Lianute ih hi hi.

Pathian thu ih heak ih saan tak ciangin, a kilawm ngawl ih ngeinate nusiat thei teng kinusia tato a, nidang in numei peuma pilna sin khuan ngangawn kinei ngawl hikale Pathian thu ih saan a kipan dadam in ih ngaisutna hong kihong tato hi. Gal 3:28 sungah Jew le Gentile, to le sila, numei le pa kilaklaw ah kilamdanna om ngawl hi. Christ Jesu hangin ih buppi pumkhat ih hina hong lak hi. Christ Jesu hangin Zaangsi Lianute zongh Zaangsi Tangpa te taw kibangin pilna sin khuan le na tatuam sep thei khuan ih nei thei zo hi. Praise the Lord!

• Tuan a pupa’n Lianu tualniam ci’n lei bangh leal ee, Tu ciang Taang taw tan bangh kim ta’ng ee.
• Thianmang thinthu nau bangh ih saan man a, taang taw tan bang kim hi ze.
• Pisei maa bang pat sa, ngia bang zom tu Thian in tem bang hong dei ze.
• Zaangsi Lianu hanlungciam vaw, zaitha phel ngua bang kho sak vaw.

Kumzalom kul (20th Century) hun sungin Zomi numei theampote ii sung pan Pathian ii a masabel in hong lap saang sak Zaangsi Lianute pawl khat ii tangthu tom sia Khuavak Magazine Vol. 3 na sungah ih mu thei hi. Khang masa Zaangsi Lianu te ii hanciamnate ih ettee tu le amate ii hong patsak sa maa ban te ih zop tu khang thakte in vaipuak ih nei hi.

1. Sm. Mang Za Cing (Khuasak) sia tuma Kum 90-100 hun pawl 1920 Kum kiim in Zomi numei theampo sung pan Sang Syama masabel Zaangsi Lianu hi. Kei numei lel po ci in na ngaisun peuma ngawl a, lai sin hun a nga po ciang pilna na sin a, tuma Kum 100 lai ngangawn in tabangh ngai sutna na nei zo hi.  Tua ahile khangthak lianute in ih sep thei, ih sin thei, na phate sin ngawlin om thathong tu hi ziam?
2. Rev. Ngiak Za Dim (Thuklai) sia Zomi numei theampo sung pan thiampiza (Reverend) a nga masabel Zaangsi Lianu hi. Ama ii a nun ziate sia Zaangsi Taangpa te ii bat laak thu na tam mama hi. A pawlpi ah kum tam mama sung pawlpi keamin, TBAWF, SRBA-WF lampui ahizong ama ii sep theina ciang taw Pathian naseam nu ahi ban ah lailam (Literature) kin sanh nei si ahikom laibu pha nano te kholin Thuklai biakinn huang sungah Laibu saal nei natu in a lampuibel nu ahi hi. Ngual hesuakna le khuangai huai sakna nei mama khat ahikom pawlpi pan pension a laak zawkciang tanga boarder zongh phuankhia a, principal seam lai hi Pension la zo hikale Pathian atu ahi thei na theampo taw maapang in a nuntakna bo ciang dong Pathian naseam ngalhang nu ci in kiciamtee hi Zomi numei theampo sung pan thiampiza nga masabel ahina hang le Pathian naseam citak khat a hina hangin USA ah om mealheak ngimnamhte in Pathian a itna le ama a patoaina in Jubilee nasia tatak 2002 kumin vawtsak uh hi SRBA, ZBC, MBC pan le mun tatuam pan zong patoaina nga tawntung a, ama ii hong nusiat zawkciang ngangawn in patoaina a nga lai Zaangsi Lianu hi. Ama in leitung ah hong nuntak pui nawnngawl hikale ama nasepnate tuni ciang dong nungta lai a, maa bang hong patsak sate khangthak lianute in ngia bang ih zom tu hi
3. Sm. Ciang Za Dim (Thuklai) sia Zomi numei theampo sung pan လႊတ္ေတာ္အမတ္ (Hlutdaw Amat) masabel Zaangsi Lianu hi. Ngam le lei atu deisak mama ahikom Thaang le Thuklai kilaklaw motor lampi sia kumpi ii vaihawm tu le Thuklai ေက်းလက္က်န္းမာေရးဌါန (kyaylet kyanma yii htanah) pan တိုက္နယ္က်န္းမာေရးဌါန (taikne kyanma yii htanah) a sua natu in a hanciam nu hi. Pathian it mama ahikom Singapore ah Laithiangtho sangkaa a, “Chin Christian Challenge to the World” ci lai at hi. Khangno taw kisai ahizong deisakna lianpi taw lai tatuam zongh at ngei hi. Korea ah ni 40 sung antang in thungen ngei a, tua zawk hun khat ciang Australia ngam ah om a, Pathian thu taw kisai in ahi thei za maapang hi.
4. Sm. Vung Khua Pau (Khuasak) sia Zomi numei theampo sung pan Air-hostess (ေလယဥ္မယ္) masabel Zaangsi Lianu hi Project tatuamte sungah zongh panmun lian vive ႏိုင္ငံတကာဆက္ဆံေရးဌါန၊ နယ္စပ္ေဒသႏွင့္ တိုင္းရင္းသားမ်ားဖြံ႕ၿဖိဳးတိုးတက္ေရး၀န္ႀကီးဌါန (International Relationship Department, Ministry of Development of Remote Area Nationalities ) ah zongh seam a, a nasep hun sung Bangladesh, Pakistan, India, Thai, Cambodia, Vietnam, Singapore le Malaysia ngam tengah pai kakoai ngei hi.
5. Dr. Molly Vum Za Cing (Buanman) sia Zomi numei theampo sung pan M. B. B S, M Sc (OG) masabel Zaangsi Lianu hi Ama sia a no pan kipan thu ngaisut thiam mama ahikom a pa in a suapui dang teng sung pan zong muangbel hi. Zongam, Kawlngam sung mun tatuam ah kumpi na a sep kakoai zawkciang a pasal, a tapa taw USA ah teang uh hi.
6. Sm. Ciang Khai (Khuasak) sia Zomi numei theampo sung pan M N. Sc masabel Zaangsi Lianu hi India-Bangalore ah Psychiatric Nursing kaa ngei hi. Nursing Training School-ah lecturer dong seam a, Falam NTS ah Principal zongh seam ngei hi. Community Home Based Care ah Assistant Project Manager seam ngei hi.
7. Sm. Cherry Mang Mann (Buanman) sia Zomi numei theampo sung pan စီမံကိန္းေရးဆြဲေရးဦးစီးဌါန (Siman king yay suaiyi htanah) ah Assistant Director masabel Zaangsi Lianu hi. Korea le China ah pilna sinin pai ngei hi.
8. Sm. Zam Thian Cing (Khuasak) sia Zomi numei theampo sung pan Bank Manager masabel Zaangsi Lianu hi. Pakistan ah pilna sinin pai ngei hi.
9. Bo Thawng Cingh Neam (Lophei) sia Zomi numei theampo sung pan ဒုရဲအုပ္ (Duh Ye oh) ma sa bel Zaangsi Lianu hi.

A tunga Zaangsi Lianu teng sia Sizang ngam bek hi ngawlin Zongam bup hong khai ettee thamman (စံထိုက္ပုဂၢိဳလ္) Zaangsi Lianu te ahi hi. amate nun dan ih et ciang pilna saang vive a nei ban ah Pathian it in a kalsuante vive hi a, innkuan pui tawh kop zongh om a, a kop ngawl zongh om hi. A kopte in zongh amate ii nasepna ah a panpui thei tu koppui vive ma na nei kim tek a, khangthakte atu in ngaisutna kong hong honsak Zaangsi Lianute ahi uh hi. Pilna sin in ngamdang lei dang ah na pai vaset uh a, tu hun khangthak Lianute in amate ettee in ih ngaisutnate puapha a, parcel a kua in hong vaitha ka tawm ci in ih ngangak sang eima hantang taw hanciam valengin pilna taw ih pai tu hong thupi hi.

Hun khat lai in tan 10 ong te in amate ii zuinop line sia zui vaziau thei a, ahizong hun khat ciang marks taw hong kiciangtan a, tuazawk MC line a nga masabel sia Zaangsi Lianu Dr. Molly Vum Za Cing hi ci in ki ciamtee hi. Hun khat sung teng MC line nga zo zongh ki om nawn ngawl valuai kale Pathian in ih minam hong khual kik a, 21 century hun sungah ih tano te pawlkhat hong om kik vanangh lei hi. —> page 3