Tua Zaangsi vontoaite sung pan Zaangsi Lianu te nga bang kihel thei a, Pathian in Lianute hong laamsaang hi. Tuateng sia (1) Lia Man Thian Cing (d/o Maj. Cin Za Pau) (2) Lia Hau Khan Dim (d/o Maj. Ngo Za Tuang) (3) Lia Dim Suan Cing (d/o Bo Cin Pau) (4) Lia Tin Khan Cing (d/o Maj. Kam Cin Lian) (5) Lia Ciin Khan Cing (d/o Maj. Ngo Za Tuang) te ahi uh hi. Khang masa Lianute bangma in khangthak Lianute zongh ngam le lei, minam hong khaisaang Lianute hong sua natu in Thian mun mai bangh ih ko hi.

Nidang hunin ngam lampui tu khawng sia ih ngaisutna sung le ih mittha sung ngangawn ah pate bekma kimu liang hi. Ahizong 2010 kum Kawlngam bup ဆႏၵမဲ (sandah mee) khiak hun lai in Lianute pawlkhat zongh Taang pate taw kibangin Mee kuang hong lui zo uh hi Tuate sung pan Zaangsi Lianu Lia Kam Khan Dim (Thuklai) zongh ျပည္သူ႔လႊတ္ေတာ္ကိုယ္စားလွယ္ (pyituh hlutdaw kusale) meekuang hangsan takin hong lui hi. Zaangsi Aung San Suh Kyi ci leang kikhial ngawl tu in ka um hi. Maisang ah lei thu van thu ah ngam lampui tu Zaangsi Lianu tam tatak ih kisamh lai hi.

Tuhun ciang numei te lap saangna (အမ်ဳိးသမီးၿမႇင့္တင္ေရး) ci sia mun theampo ah a kison bel thu khat hi. Laam saang ih ci ciang a niamna ah om ahikom lapto kul hi tuak hi. Hong kilaam saang nuam kale zong Zaangsi Lianute sang pan lapto thei tu dinmun ih nei bale hong kilaamto thei ngawl tu hi. A kisamh mun ah hong lapto thei natu in pilna thiamna ih nei khol kul tu hi. Tua ahikom Zaangsi Lianute in zing khuavak le tuman le bawm zamh in, nizun kai liang a sun khuateak nisa kakdeau thuakin na seam bek tute ih hi nawn bua a, pilna thiamna sin hunin hanciam valeng a, ih zuzau ngawl tu le pilna nei ih sua kim tek tu sia thupi mama tu hi. Kum cing pole khualhaw tu ahibale pasal nei tu ciang bek lungtup in ih nei nawn batu a, pasal ih nei a, khual ih haw zonghin maizum ih thuak ngawl tu le zawnsak ih thuak ngawl natu in a hun lai pilna ih zon tu thupi mama hi. Ngam le lei, minam atu a kisamh mun ah maapang thei tu in ih kinging tek tu hi.

Mipilte ii paunakte ih et ciangin nute thupina ih mu thei hi. At tu hi leang tam mama om tu hikale mipil khat ii sonna ah “Kei ii nu bang vive nu kinei le leitung ah thonginn om ngawl tu hi” ci hi. Nute sia innkuan nuntakna sungah pate atu ahizong tate-atu ahizong a thupibel suak hi. Pilna nei nu khat ii lampuina le pilna nei ngawl nu khat ii lampuina sia Kilamdang mama a, tate taw ngei a kithawl bel sia nute ahikom pilna nei nu tam mama ih taangsamh hi. Zaangsi Lianute sia minam dangte sangin pilzaw, teizaw, ngilo zaw in hong kiciamtee a, ngual sungah zongh maiphul ngamin minam dang Lianute sangin a madok zaw tawntungte ih hi hi. Nidang hun le tu hun sia leitung piandan hong kidang a, tapa 10 sang in tanu khat ii lamhsa sia nu le pa in zeak theizaw hi. Tanu pawlkhatte in nu le pa vaakin innsung nei le lamh taw zeam a, tapa pawlkhat in zuak zawk talai a ciam innkuan kitam mama zo hi. Tasia taw a kileengat in tapa pawlkhat ciim kiukiau tawntung kale tanu pawlkhat vai milmial leleau thong hial hi. Zaangsi Lianu ih hi nale ih minam maimial sak batawng. Nidang in Kawlte taw a teang Lianute lamdang kisa mama kale tuhun ciang ngamdang mi taw a teang Lianu zongh kitam vaial zo a, ih teenna bangkua, ih teenna ngam, ih teenna khua sim tek ah cii bang hong teal ih Pathian mangil ngawlin ih kiim le paamte atu sunni bang a taang Zaangsi Lianute ih sua kim tek natu in ih pilna, ih teina, ih ngitlonate zangh thaim tek tawng.

A tunga ih atsa bangma ei hangin ih minam min a dai tu sia Zaangsi Lianute in kidopbelin ih nei tu hi. Khang masa Lianute hangin maipha ih nga bangma khangthak Lianute hangin Khangsawn Lianute ii maipha ngana ih sua tu thupi hi. Alalsa ih innkuan, a lalsa ih ngam le lei Zaangsi Lianute hangin paak bang kitoai kik tahen.

____________________

Heaktu: SCC Magazine 2011 sungpan