Sizang Diaspora le Diaspora Sizang

bangma tua lai hunin a cithei zaw hiat teng ma ngamdang tai in diaspora siasua uh hi. A tamzaw Mikaang ngam teng ma ahi Canada, USA, UK, Australia, NZ, le Europe ngam tuatuam ban ah, Latin America, South America, sang zongh ah tai theina po ah lohingna, tuiciim luanna mun del in diaspora uh hi. Mun tuatuam ah Diaspora Korean te tuni in mangthang tuan ngawl uh hi. Banghangziam cile amate in a thetna papo ah pawlpi kipan paih uh a, community kip takin nei ahihang hi, ci thu kimu hi. Ngam tuatuam ah Diaspora Korean te in amate omnana ah Korean mi ma in om uh a, minam dang suak tuan ngawlin amate identity kip takin nei uh hi.

Kaamsiatna taw Mexico ngam theng Korean te in tuni in Korean ka hi uh ci ngam ngawl uh hi. Mexican minam no khat in kikoi, kiciamtee ta hi. A hang a kikan ciangin a kimu thu khat om a, tua in amate Mexico ngam a thet ciil lai pawlpi kipan ngawl citciat uh hi tuak hi. Christian tam ngawl khawng zongh hi thei tha tu hi. Tua in tu ni Diaspora Sizang mite atu lesson khat ahi hi. Diaspora Sizang mite ih thetnana mun ah Sizang pawlpi/ kipawlna khat manlang belin kipat tu kisamh hi. Tua pawlpi/kipawlna sungah Sizang kam pau in Sizang lai taw thu kizaksakna nei tu hong thupi mama hi. Tua hi buale maisang ah Sizang mi hi nawn ngawl tu a, native minam no khat kisuak lei tu hi.

IX. Leitung Diaspora Mission Etkakna
Leitung ah Christianity kizelna et kik ciangin diaspora tungtawn in pawlpi piang kakoai ci kimu thei hi: Stn. Antioch pawlpi. Kum zalom khat hun Jewish Christian te kingawtna le haksatna tuatuam hang taw ngamdang peam in a diaspora na uh pan leitung mun tuatuam ah Pathian ngam zaina piang hi. Sen ngam China ah Korean pawlpi piankhiatna thu etkik ciangin, Diaspora Korean khat tungtawn in piangkhia ci thu kimu hi. Tuni in Sizang pawlpi mun tuatuam ah hong pian tu thupi tu hi. Hun khat ciang ih ngam kizuan kik nuam tu a, tua hun ciang Sizang mi kician tak ih hi tu thupi hi.

Tuni in Diaspora Korean te khang niina 2nd generation khangno tampi tak in a ngam uh zuan kik vazai ta uh a, a ngam khanto natu nasia takin a pilna a thiamna a hatna uh taw thanuam takin naseam vatem bek uh hi. Diaspora Sizang khangnote zong ngamdang ah pilna thiamna nasia takin sin tu kisamh bel hi.

Maisang ah Kawlngam kumpi ki ukna hong kilaih tato le Sizang Diaspora hun khat hong bo tu hi. [tu in zongh hun kikheal nuam mama zo hi]. Tua hun ciangin tu a ngam thumna theng sa pawl hile hong cia kik nawn khol ngawl tu a, hong theng thua la om nawn bua thong le ngual ngam ngual lei ah mangthang tu lauhuai hi. Sizang pawlpi le kipawlna community kip takin phutin kipawl khop theina hong thupi mama tu hi. Tua hi buale tu khang sung hile kician ngawl lai tu a, khangsawnte hun ah bo lam man lam manaw tu ih hi hi. Tua Diaspora Sizang pawlpi/ kipawlna sungah maisang ciang Sizang kam a kipau nawn thong tu ziam?

X. Diaspora Tungtawn in Minam, Ngam le Pawlpi Khantona
Korea minam le ngam khantona sia 1988 Olympic poaipi innteak a sepna pan thakhatthu in kikhai vat hi. “Ei leitung ah pusuak tu, leitung in ei ngam hong tum tu!” ci sia Korean te ‘motto’ hi a, President Noh Tae-Woo hun sung a hanciamna ahi hi. Ngam mite passport pia in ngamdang ah khualhaw tu oai a, ngamdang mite ngam sungah tumna entry visa pia uh hi. Tua tak ciangin a ngam uh pilna, thiamna, sumvawtna business, etc…. a khanto bangma missionary sawl khiat zongh nasia takin hong khang vazia hi. Tu laitak in leitung ngam tuatuam ah Korean missionary 24,000 vai om hi. Tua bangma in Korea ngam sungah ngamdang mi tu laitak 1.5 million om hi. Diaspora tungtawn in Pathian ngealna om hi ci in Korea pawlpi in um hi. Tua ahikom Korea ngam sung om ngamdang mite atu amate pawlpi tek pan ngamdang kam taw biakpiakna vawtsak uh a, pastor cialsak tuan lai uh hi. English service zongh nei zawk tu hanciam uh hi. Topa Sawlpina ‘The Great Commision’ in sangmang sawl khiatna ‘sending missionary’ bek taw taangtung zo ngawl tu a, sangmang saanna ‘accepting missionary’ tungtawn in taangtung “fulfilled” zo pheang tu ci sia tuni globalization paradigm muna ahi hi. Sawltakte tangthu 13 sungah en leang Antioch pawlpi ah sawltakte ngamdang diaspora mi vive ahi hi: Barnabas—Cyprus pan; Simeon— Niger, African mi; Lusius— Cyrene mi; Manaen—Roman mi, Saul—Tursus khua mi, etc.

Tu ni in Korea ngam sungah pawlpi 50,000 vaal om a, mission nasepna ah kihel tatak sia 15% bekma hi pheang hi. Ngam sung zongh ah pawlpi khangto ngawlin kiam lam manaw zaw ta [2000s hun sung theampo] ahi hi. Taanghlai Antioch pawlpi in a ettehuai model Diaspora pawlpi khat hi ci thu Korean pawlpi in ngaisun mama kik hi. Tu laitak Korean mi 8.5 million leitung ah Diaspora in kithethaang uh a, minambup ii zakhen10% ahi hi. Leitung mun tuatuam ngam 175 ah pawlpi phuan kakoai uh suak hi. Senngam China ah Sente ii mat thongtaak khat tungtawnin pawlpi piang ahi hi: Russia, Hawaii, Mexico, Middle-East, America, Europe, Africa ngamte ah peam kakoai uh a, Mexico ngam sim ngawl mun theampo ah pawlpi phuan kakoai uh hi.

Philippines pawlpi en leang, ngam sungah pawlpi 70,000 vai om a, ngamdang ah missionary a puak zo bua uh zongin naseam sum thalaw in a pai tampi om hi. Tuate in a ngam atu ngamdang sum zong bek hi ngawlin, Christian upna leitung mun tuatuam ah kizelsak ahi hi. Pilipino te sia zakhen 90% val Christian ahi uh hi. Tuni in leitung mun tuatuam ah Diaspora Sizang mimal bangza ih om ziam? Ih thalawsa sumte ih ngam ah ih thak ciangin ih ngam in ngamdang sum a thalaw suak a, ngual ngam ngual lei ah ih citakna taw Topa Pathian ngam zaisak ih hi hunlam ih kingaisun tha ziam?

XI. Thukhupna: Diaspora Sizang Vaipuak
Kawlngam, Vaingam le leitung mun tuatuam ah tuni in Sizang pawlpi/ kipawlna bangza a om zo ziam? Diaspora Sizang pawlpite in leitung mission taw kisai bang ngaisutna le muna ngealna vision ih nei ziam? Tuni in Diaspora Sizang mite zongh leitung mun tuatuam ah Christian upna kizelsak tu in Pathian in hong puak hi ngawl tu kici thei ngawl hi. Tua ahikom ih nuntakna, ih omzia, ih ngamtatzia te pha takin kidop mama tu thupi hi. Mihingte in ih nuntakna hong en in, laisim in hong sim uh hi. Ih kam pan ih son keak sangin ih nuntakna, ih ngamtatna aw nging zaw hi. Tuni in Diaspora Sizang mite ii dinmun koi ciang hi a, ih vaipuak bang ciang ahi ziam?

Heaktu: SCC Magazine No (5) sungpan a kilakik hi