SCC Sunmang

Vanh zuakte zongh kipawl khop vaihawmna om ngawlin ih tang leen tek ciang sumbul tam nei ngawl teng pui in sumbul tam neite khanpi in khangto hi. Hi bang dan nasep sia “Ui sangu kitu” taw kibang bek a, minam u le nau itna kikhualna om ngawl hi. Nasep khat papo Sizang mite kipawl khawm in vaihawm vadiam in ih seam bua nale kikhangto ngeingawl tu hi. Khuapi khat sung hong teang Sen minamte nasep dan en leang ansai bebek seam siat ngawl hi. Niangtuisai a vawt, moh bebek a vawt, dawnthei bebek a zuak ci bang nam khat tek seam a, khat le khat kihu in kilaamto hi. Nganhing khoai sia sial, khui, keal, tuu a hon in mundang ah kipawl in khoai leang phabel hi. Mivomte sia loai noaisuk, khui noaisuk, kealpui noaisuk a honin khoai a, khuapi puasang ah ompui paih hi. A sa, a noai, a eak zuak a, a eak sungah antee namcin ciingin zuak a, nuamsa mama hi. Ak bek vok bek zongh khua puasang ah a khoaite khangto zaw hi. A cii zongh dam zaw a, peet mama zaw si hi.

Pilna sia thupi mama hi. Sangmang Johnson in Zo mite bang kum ciang khangto tu nu ziam? ci le B.A ong pilna nei khat in lo hong thaw ciang, sumbuk hong sep ciangin khangto tu nu hi ci hi. Solomon kumpipa in pilna sia thahatna sangin phazaw hi, Ecc 9:16 ci hi. Pilna nei khat in lotho na hong seam thong le ngualdangte ii bokbawn bebek a ciin hun sung ama in maza hong ciing tu a, kuama dang in tam ciing ngawl ahikom in a manpha tu hi. Pilna nei khat in ngan hong khoai ciang kuama dok kul ngawl in ama in bawl thei paih tu a, a dan hong thiamzaw paih tu hi. Pilna nei khat in lotho in ngankhoai thong le mawtaw te, vanh zuaksawn a ngual theamte in theam zo ngawl paih tu hi. Bangza po ih hat a, ih cii a dam hial zong pilna nei ngawl khat in pilna nei khat dem zo ngeingawl hi. David in thahatna taw ngam uk a, Solomon in pilna taw uk hi. Solomon kumpi sep sung ngam mite nuamsa zaw hi. Vaang neizaw a, kumpi dangte in zakta zaw a, letsong tam mama saang hi. Lo na tho a, ngan na khoai zong pilna na nei le ngual in hong zakta tu a, pilna na nei buale ngual zawnsak in na om tu a, na neisa ngangawn na keam zo buatu hi.

Ciidamna sia khamh sangin phazaw, ngun sangin phazaw hi. Zaangsi momnote na ciidam natu in nisim be nam khat papo na neak zawk tu hanciam in. Sapittui ni khat hai khat, aktui tang 5 na neak zawk tu hanciam in. Thingnga tatuam khat peuma nisim ne tu a, niangtee tui hawp tawntung in. Meenga meetee na neak a tam mama le na ciidamna khang mama tu hi. Sathau zol vanawm ne heak in a, ci al valaih ne tawntung heak in. Zu le nguithei sia doai an hi ci in kii mama lete na ciidam in na khansau zaw tu hi. Niangphan hawp tawntung lete pumpi sungah natna tum tu haksa ci hi. Zatui zatang neak sangin a kituiton dimdiam in hi teng nezaw lete ciidam in na khansau tu a, na sep na vawt peuma nuam na sa tawntung tu hi.

Mun theampo ah mincimh tam vaial hi. Banghangziam? Leitangh a leen thingkung lopa a ciidam ngawl ahikom in leitangh leen zo nawnngawl hi. Banghang leitangh leen la liang ziam? Kumsim a pumpi kihaltum tawntung ahi hu in a pumpi, a zung a ciina hi. Natna lungno a ne vacimte ii neak tu thingnga, lopa a nga om zo nawn ngawl a neak tu dai bang kamh ahi hu in natna lungno tam vaial a, mite ciidam sitset ing a ci ih om nawn bua hi. Tua ahikom in duisung nganhing tatuamte thalup tu ngaisun nawn heak in a, kiim le paam thingkung lopa te haltum tu thokheal bang kheal in. Dynamite taw, Battery taw, zatui taw ngasa mat tu hanciam nawn heak in a, tui sung nganhingte khual in. Eima bangma nuntakna neite ahikom in thingkung lopa, nganhing nam tatuam te al bang da in lakmai tai zo nawn ngawl hi. Akua bang teng piangthak in ei hong khual thei thong tu ziam ci in Pathian vawtsate in ngakla hi (Rom 8:19) ci hi. Meisan ih toai kheal leang a, saili le Baterry ih toai kheal tek leang ih kiim ih paam paak bang hong paih in, lo bang hong hing kik tu hi. Nunnuam Zaangsi vangkhua hong suak tu a, Et lawm ngam kuam Zaangsi ngam nuam hong suak tu hi.

Pau. 27:10 Nangma ngualtamte ahizong na pa ngualtamte ahizong mangil heak in. Hi kammal sia midang taw kizopna, kipee awna, a sonna hi a, ngual theampo taw kilemzawng tu, kituiton tu a deina hi. Ngualdang tampi taw kilem leang ngaisutna pha tam mama kinga a, nuntak khuasakdan hong nuam tuamsak hi. Pau 5:22 Pu Thuan Tak suanh teng beak lemzawng thei leang a, khut khat khai bang, tol khat delh bangin maapang khawm thei leang ngaul nuntakna kiban zozawtu hi. Topa hong huna taw Thuan Tak tute a hau, a pil ngual taw liangko kim tam ma ki om hi. Ih hauna ih pilna le ih thuneina taw ih beete hong laamto le uhte mual tung va bang ih tuang tuam tu hi. Tu hun ciang in Email, Internet le phone taw leitung theampo ih kipaupui thei a, zingvai ih hawm thei zo hi. Mun tatuam ih omna tek pan Pupa ngam hong phawk tek le uhte a, ih ngam sung luitui luang thathong theampo khualengmei hong suaksak zo le uhte kumsim thinghah taan (ton) 10 tek bang a kisusia tawntung sia hong bo tu a, Zaangsi ngamkuam hong niim dildial tu hi ngawl ziam? Lo bang hong hing kik tu hi ngawl ziam? Ngam khangto, ngam hau, nuntakna nuam ih cite khualengmei nuam tak a zangh theite hi lei hi. Khantona a thupi bel khat sia lampi hi. Ih ngam sungah kum 60 sung bang ih zaksa mawtaw lam zongh a nuamzaw, a zaizaw in, kivawt zo peuma ngawl lai a, ngal lai lampi sia ma tu dong kizangh zen lai hi. Ih lampi hong nuam le ih nuntakdan tam mama nuamzaw lai tu ci kimu nginge napi kivawt zo ngawl hi.

Ih pu ih pa hunin tha le mat taw ngual zawna la hi. Tu hun ciang kiniamkhiakna taw Zaangsi momnote ngualzawna ih la tu a, Pathian sia Pa in ih nei tu hi. Mt.6:96 Thaa Thiangtho in ih lampui sak tu hi. Eph.5:8. Sumpi sawm a khat pia in, Mai 3:8. Ih nu ih pa phatvawt leang, Ep 6:2 van ah a om ih Pa Pathian in hong laamsaang tu hi. Midangte it in, Mt 22:39 Ngupkhiat lungdamna thu taangko leang, Eze 5:8 Ih tu ih ta khang dong nuai simlei nun bang nopna in hong sulzui susuk tu hi. Zaangsi momnote thinkhat lungkhat sa in maa ih pang khawm le John 17:21 Zaangsi lungtup maa bang ih tun zo tek tu hi.

Nidang in pilna le thiamna kithupisak kasap tu hun ciangin hau tu bek kithupi sak tha zo hi. Pilna ma thupisak zaw tawng. Hong lampuite zatak tu a thupi bangma, lampuite zongh a zatakhuai ih hi tu thupi hi. Ahi thei valiam bek ih tumh buatu a, a pha mama a kho mama ih tumh tu hi. Ngana tu bebek ih khuat buatu a, piakkhiatna ih bulsak zaw tu hi. Ih pu ih pa te in sum tam pipi bo in ngal ai sa ai in vantung pai tu na sawm uh hi. Ei ih hile sum pheak khat zongh bo ngawlin Jesus Christ upna taw Pa Pathian innpi lua ih sawm tu hi. Zaangsi momnote khut khat khai bangin Mission nasep ih sawm tu a, vantung thaman thupi mamate mukholin maa bang ih pang thiam le Zaangsi lai ah ngual tung va bang ih tuang tek tu hi. Thian saunuam thangvan khua ah Thian hawmtel nau bang ih saang tek tu hi. Hi SCC sunmang in Zaangsi ka ciin le ka tuaimang zatamte khangthei hong lo sak tek tahen.

Heaktu: SACC Annual Magazine 2012 sungpan